ලිපි අංක - 05

කොටස් වෙළෙඳපොළ ගැන....

ලිපි අංක - 05

කොටස් වෙළෙඳපොළ ආයෝජනය පටන් ගන්නෙ කොහොමද කියලා තමයි අද මම ඔයාලට කියලා දෙන්න හදන්නේ...

කොටස් වෙළෙඳපොළේ ගනුදෙනු සිදුකරන්න පුළුවන් කොටස් තැරැව්කාර ආයතනයක් හරහා විතරයි. ඒ නිසා අපි මුලින්ම කරන්න ඕනෙ කොටස් වෙළෙඳපොළේ සාමාජික තැරැව්කාර ආයතනයක් තෝරාගන්න එක. කොටස් තැරැව්කාර ආයතනයක් තෝර ගත්තට පස්සෙ අපි ගන්න කොටස් ටික තැන්පත් කරන්න ගිණුමක් හදාගන්න ඕනෙ. මේ ගිණුමට කියන්නෙ CDS ගිණුම කියලා. අපි මිළ දී ගන්න කොටස් තැන්පත් කරලා තියන්නෙ මෙන්න මේ CDS කියන ගිණුම තුළ. ඔයා තෝරගත්ත තැරැව්කාර ආයතනය මගින් ඔයාට නොමිළේම CDS ගිණුමක් හදා ගන්න පුළුවන්. CDS ගිණුමක් හදලා දෙනවට අමතරව කොටස් තැරැව්කාර ආයතන තවත් වටිනා සේවා රැසක් සපයනවා. ඒ නිසා කොටස් වෙළෙඳපොළේ ගනුදෙනු සිදුකරද්දි කොටස් තැරැව්කාර ආයතන කියන්නෙ මොනවද කියලා දැනගෙන ඉන්න එක අත්‍යාවශ්‍ය දෙයක්.

කොටස් තැරැව්කාර ආයතන කියන්නේ මොනවා ද?

කොටස් වෙළෙඳපොළේ ගනුදෙනු සිදුකරන්න බලය තියෙන්නෙ කොටස් වෙළෙඳපොළේ සාමාජික තැරැව්කාර ආයතන වලට විතරයි. මේ තැරැව්කාර ආයතන කොටස් ගනුදෙනු වලදී කොටස් වෙළෙඳපොළ සහ ආයෝජකයා අතර අතරමැදියෙකු ලෙස ක්‍රියා කරනවා. කොටස් තැරැව්කාර ආයතන විවිධ වටිනා සේවා රැසක් ආයෝජකයින් වෙනුවෙන් සිදු කරනවා. ඒ වෙනුවෙන් ඉතා සුළු මුදලක් කොටස් ගනුදෙනු සිදුකිරීමේදී තැරැව්කාර ගාස්තු ලෙස අය වීම සිදු වෙනවා.

කොටස් තැරැව්කාර ආයතන විසින් සපයනු ලබන වටිනා සේවා....

ආයෝජකයින් වෙනුවෙන් CDS ගිණුම් ආරම්භ කිරීම හා ඒවා පවත්වාගෙන යාම.

ආයෝජකයින් වෙනුවෙන් කොටස් මිළ දී ගැනීම හා විකිණීම සිදුකිරීම.

කොටස් වෙළෙඳපොළ ගැන දැනුම අඩු ආයෝජකයින්ව දැනුවත් කිරීම.

ආයෝජකයින්ගේ CDS ගිණුමේ ගැටළු මතු වූ විට ඒවා නිරාකරණය කර දීම.

කොටස් මිළ දී ගත යුතු වෙලාව සහ විකිණිය යුතු වෙලාව පිළිබඳව ආයෝජකයින්ව දැනුවත් කිරීම.

සෑම ආයෝජකයෙක් සඳහාම ආයෝජන උපදේශකවරයකු ලබා දීම.

විවිධ සමාගම් හා ව්‍යාපාර ක්ෂේත්‍ර පිළිබඳව සමීක්ෂණ සිදුකර වාර්තා ඉදිරිපත් කිරීම.

ඉතින් මේ වගේ වටිනා සේවා සපයන තැරැව්කාර ආයතන කොහෙද තියෙන්නේ කියලා අපි බලමු.

කොටස් තැරැව්කාර ආයතනයකට පහසුවෙන්ම සම්බන්ධ වෙන්න පුළුවන් විදිහ තමයි කොළඹ කොටස් වෙළෙඳපොළේ ශාඛා කාර්යාලයකට යන එක. කොළඹ කොටස් වෙළෙඳපොළේ ශාඛා කාර්යාල ලංකාවේ හැම පළාතක්ම ආවරණය වෙන විදිහට එයාලා පවත්වාගෙන යනවා.

කොළඹ කොටස් වෙළෙඳපොළේ ශාඛා කාර්යාල පිහිටා ඇති ප්‍රදේශ...

මාතර ශාඛාව - මාතර
මහනුවර ශාඛාව - මහනුවර
කුරුණෑගල ශාඛාව - කුරුණෑගල
මීගමුව ශාඛාව - මීගමුව
යාපනය ශාඛාව - යාපනය
අනුරාධපුර ශාඛාව - අනුරාධපුරය
ඇඹිලිපිටිය ශාඛාව - ඇඹිලිපිටිය
ගම්පහ ශාඛාව - ගම්පහ
කිරිබත්ගොඩ ශාඛාව - කිරිබත්ගොඩ

ඔයාලට මේ ශාඛා වලට අනුබද්ධ කොටස් තැරැව්කාර ආයතන ගැන දැනගන්න පුළුවන් මේ ලින්ක් එකට ගියොත්...
https://www.cse.lk/home/branchOfficesSalesOutlets

එහෙනම් ඉතින් පුලුවන් තරම් සරළව තමයි අද ලිපියෙනුත් ඔයාලට කොටස් වෙළඳපොළ ගැන පැහැදිලි කිරීමක් කලේ. මම හිතන්නේ අද ලිපියෙන් ඔයාලට මොකක්ද කොටස් තැරැව්කාර ආයතනයක් කියන්නෙ, කොහොමද අපි කොටස් තැරැව්කාර ආයතනයක් හරහා CDS ගිණුමක් හදා ගන්නේ, තැරැව්කාර ආයතනයකින් අපිට ලැබෙන සේවා මොනවද කියලා පැහැදිලි වෙන්න ඇති....

එහෙනම් මේ ලිපිය ගැන ඔයාලගෙ අදහසත් දාන්න. තේරෙන්නේ නැති දෙයක් තිබුණොත් අහන්න. අඩු පාඩු තියෙනවා නම් පෙන්නලා දෙන්න. තවත් මේ වගේම කොටස් වෙළඳපොළ ආයෝජනය ගැන ලිපියකින් පස්සේ හම්බෙමු. 

එහෙනම් ඔයාලට ජය!

සටහන- ධර්මප්ප්‍රිය ආනන්ද විසිනි...