ලිපි අංක - 06

කොටස් වෙළෙඳපොළ ගැන....

ලිපි අංක - 06

කොටස් වෙළෙඳපොළ ආයෝජනය කිරීමේ දී අවධානම අඩු කර ගන්නේ කොහොම ද?

ඕනෑම ආයෝජනයක යම් කිසි අවධානමක් තිබෙනවා.. කතාවටත් කියනවනේ බිත්තර සියල්ල එකම භාජනයක දාන්න එපා කියලා. ආයෝජනයටත් ඒක අදාලයි. හැබැයි ඉතින් අවධානම වැඩි වන තරමට තමා ආයෝජනයකින් ප්‍රතිලාභයත් වැඩිපුර ගන්න පුලුවන්. කොටස් වෙළෙඳපොළ ආයෝජනය කිරීමේදීත් අවධානම වැඩි වන තරමට ප්‍රතිලාභය වැඩි. හැබැයි අපිට පුලුවන් අවධානම අඩු කරගෙන හොඳ ආයෝජනයක් කරන්න. ඒ කරන විදිහ තමයි මන් කියන්න හදන්නේ.

කොටස් වෙළෙඳපොළ ආයෝජනයේ දී ගොඩාක් අය අමාරුවෙ වැටෙන්නෙත් අවධානම ගැන මුළින් හිතන්නෙ නැති නිසා. හිතන්නකෝ ඇත්තටම කොටසක වටිනාකම රුපියල් 10 වෙච්ච කොටසක් ඉතා කෙටි කාළයකින් රුපියල් 20 ට විතර යනවා කියලා. එතකොට ගොඩාක් අය කරන්නේ ඒ කොටසේ මිළ තව ඉහළ යයි කියලා හිතලා රුපියල් 20 ටත් ගන්නවා. ඒත් බුද්ධිමත් ආයෝජකයෙක් හැම විටම බලන්න ඕනෙ රුපියල් 20 ක් ඒ කොටස වටිනවද කියලා. ඒක බලන්න පුලුවන් ආකාර කිහිපයක්ම තියෙනවා. එකක් තමයි ඒ සමාගමේ කොටසක ඉපයීම බලන්න ඕනෙ. ඒ කියන්නෙ අපි ගන්න කොටසකට අවුරුද්දකට සමාගම කීයක් ලාභ උපයනවද කියලා. සමහර සමාගම් වල කොටසක ඉපයීම (EPS) සෘණ. ඒවාගේ සමාගම් වලට ලාභාංශයක් ගෙවීමේ හැකියාවක් වත් නෑ. ඒවගේ සමාගම් වලින් ඉවත් වෙලා පැහැදිලි අනාගතයක් තියෙන හොඳ ඉපයීමක් තියෙන ඉතා වටිනා සමාගම් වල ආයෝජනය කිරීමෙන් අපේ අවධානම අඩු කරගෙන නිවැරදි ආයෝජනයක් සිදු කරන්න පුලුවන්. මීට අමතරව පහත කරුණු ගැනත් සැළකිලිමත් උනොත් ඔයාලගේ ආයෝජනය ගොඩාක් සාර්ථක වෙයි.

අපි යම් කොටසක් මිළ දී ගැනීමේ දී ඒ කොටස ඉතා අඩු මිළකට මිළ දී ගන්න ඕනෙ. සති 52ක අවම අගයකට ආසන්න අගයක දී මිළ දී ගැනීම හොඳයි. 
ඒ කියන්නේ කොටසක මිළ උපරිම අඩු අගයකට අළෙවි වන විට කොටස් මිළ දී ගැනීම ඉතා උචිතයි. මොකද කිසියම් අවස්ථාවක දී එම කොටස් ඉතා ඉක්මනින්ම ඉහළ නැගිය හැකියි. හැබැයි සමාගම පාඩු ලබනවා නම් අඩු මිළ ගණන් වලට මිළ දී ගැනීමද නොකළ යුතුයි. හේතුව තමයි සමාගමක් පාඩු ලබන විට කොටස් මිළ කුමන අගයක් දක්වා පහත වැටේ දැයි කිව නොහැකි වීම.

එක සමාගමක පමණක් ආයෝජනය නොකර හොඳ සමාගම් කිහිපයක ආයොජනය කිරීම හොඳයි.
එක සමාගමක කොටස් විතරයි නම් අපි ගාවා තියෙන්නෙ ඒ සමාගමට මොකක් හරි උනොත් අපේ සම්පූර්ණ මුදලම අවධානමකට පත් වෙනවා. අපි හිතමු රජයෙන් අලුත් tax එකක් ගැහැව්වා කියලා. ඒ වගේ අවස්ථා වල දී අපි සමාගම් කිහිපයක ආයෝජනය කරලා තියෙන එක ගොඩාක් ප්‍රයෝජනවත්. මොක ද එකකින් පාඩුවක් උනත් අනිත් සමාගමෙන් ඒ පාඩුව මග හැරෙනවානේ.

අනිත් දේ තමයි විවිධ වියාපාර ක්ෂේත්‍ර වලට අයත් කොටස් මිළ දී ගන්න එකෙනුත් අවධානම ටිකක් අඩු කර ගන්න පුලුවන්.

අපි හිතමු අපි හෝටල් විතරක් ගත්තා කියලා. එතකොට සංචාරක පැමිණීම අඩු උනොත් සමාගම් වල ලාභය අඩු වෙලා අපි ගත්ත කොටස් වල මිල අඩු වෙන්න පුලුවන්... ඒ නිසා බැංකු, ඉදිකිරීම, වැවිලි, ආහාර වගේ අංශ කිහිපයකට අදාල කොටස් මිළ දී ගැනීමෙනුත් අවධානම අඩු කර ගන්න පුලුවන්.

හොඳ ලාභාංශ ගෙවන සමාගම් මිළ දී ගැනීමෙනුත් අවධානම අඩු කර ගන්න පුලුවන්..

හිතන්න 8% ක් විතර ලාභාංශ ගෙවන සමාගමක කොටස් ගත්තොත් කොටස් මිළ ඉහළ ගියේ නැතත් ඒ ලාභාංශ විදිහට ලැබෙන 8% උනත් ප්‍රමාණවත්නෙ. පසු කාලීනව එම කොටසට ඉල්ලුම වැඩි වෙද්දි ගත්ත මිළට වඩා වැඩි මිළකට විකුණලා ප්‍රාග්ධන ලාභයක් ගන්නත් පුලුවන්.

තවත් අවධානම අඩු කර ගන්න විදිහක් තමයි එකවර විශාල කොටස් ප්‍රමාණයක් මිළ දී නොගෙන කොටස් වල මිළ හැසිරීම අධ්‍යයනය කර කොටස් ටිකෙන් ටික එකතු කිරීම.

අපි යම් කිසි සමාගමක කොටස් 1000ක් මිළ දී ගන්න ඉන්නවා නම් එක් වරම කොටස් 1000 මිළ දී ගන්නේ නැතුව කොටස් මිළ ටිකෙන් ටික පහළට එන විට කොටස් ටිකෙන් ටික මිළ දී ගන්න.

කොටස් වෙළෙඳපොළ ආයෝජනයේ දී ඉතා වටිනා තවත් දෙයක් තමයි කිසිම අවස්ථාවක පාඩුවට කොටස් අළෙවි කරන්න එපා. එහෙම උනොත් නම් ඒ පාඩුව නැති කර ගන්න අමාරුයි. කොටසක මිළ පහළට අවොත් ටිකක් තියාගෙන ඉන්න. කොයි මොහොතක හරි නැවත මිළ ඉහළට ගිය පසු විකුණන්න.

එහෙනම් මන් කොටස් වෙළෙඳපොළ තුළ ආයෝජනය කරන විට අවධානම අඩු කර ගන්න විදිහ කිහිප ආකාරයකටම කියලා දුන්නා. මේ කරුණුත් හිතට අරගෙන ඔයාලගේ ආයෝජනය සාර්ථකව කරන්න.

ඉස්සරහට තව දන්න දේවල් කියලා දෙන්නම්.
අඩු පාඩු තිබුණොත් පෙන්නලා දෙන්න...

එහෙනම් ඔයාලට ජය.......

සටහන - ධර්මප්ප්‍රිය ආනන්ද විසිනි.......